Mahanadi Viral News భువనేశ్వర్‌: ఒడిశాలో ఓ అనూహ్య ఘటన వెలుగు చూసింది. కాళ్లు కట్టేసి ఉన్న ఓ మహిళ నదిలో కొట్టుకువచ్చింది. ఆమె కేకలు విన్న మత్స్యకారులు.. సురక్షితంగా కాపాడి ఒడ్డుకు చేర్చారు. దాదాపు 30 కి.మీ మేర నదిలో కొట్టుకువచ్చినట్లు అంచనా వేస్తున్నారు. ఛత్తీస్‌గఢ్‌కు చెందిన మహిళగా స్థానిక పోలీసులు గుర్తించారు.
Mahanadi Viral News
ఒడిశాలోని ఝార్సుగూడకు సమీపంలో ఉన్న పల్సాడ ప్రాంతంలో కొందరు మత్స్యకారులు చేపలు పడుతున్నారు. అదే సమయంలో నదిలో కేకలు వినిపించాయి. వెంటనే ఆమెను రక్షించి.. నీరు, ఆహారం అందించారు. అనంతరం స్థానిక పోలీసులకు అప్పగించారు. విచారించగా.. ఛత్తీస్‌గఢ్‌లోని రాయ్‌గఢ్‌కు చెందిన సరోజిని చౌహాన్‌ (33)గా గుర్తించారు. అనంతరం స్థానిక ఆసుపత్రిలో చికిత్స అందించి కుటుంబ సభ్యులకు సమాచారం ఇచ్చారు.
భర్త నుంచి విడిపోయిన ఆమె.. సోదరుడి కుటుంబంతో కలిసి ఉంటోందని విచారణలో తెలిసింది. అయితే, ఆమె మానసిక స్థితి బాగాలేకపోవడంతో కాళ్లను సంకెళ్లతో కట్టేసినట్లు ఆమె సోదరుడు పోలీసులకు వెల్లడించాడు. నదిలో ఎలా పడిందనే విషయం తెలియదన్నాడు. వైద్య పరీక్షల అనంతరం ఆమె కుటుంబ సభ్యులకు అప్పగించినట్లు జిల్లా ఎస్పీ వెల్లడించారు.
Disclaimer: This story is auto-aggregated by a computer program and has not been created or edited by newStone.