Fact Check – Vaccine in Periods Time: ఇండియాలో కరోనా మహమ్మారి ఉధృతి కొనసాగుతోంది. లక్షల సంఖ్యలో రోజువారీ
కేసులు నమోదవుతున్నాయి. రోజుకు 3 లక్షలు దాటుతున్నాయి కేసులు. కేసులు
పెరుగుతున్న నేపథ్యంలో వ్యాక్సిన్ ప్రక్రియను వేగవంతం చేసింది కేంద్రం.
ఇందులో బాగంగానే కోవిన్ యాప్ ద్వారా రిజిస్ట్రేషన్ చేసుకున్న వారికి మే 1
నుంచి వ్యాక్సినేషన్ అందించనున్నారు. ఇప్పటికే దేశంలో 45 ఏళ్ళు నిండిన
వారికి వ్యాక్సిన్ ఫ్రీగా అందిస్తున్నారు. అయితే, 18 ఏళ్ళు నిండిన వారికి
మే 1 నుంచి వ్యాక్సిన్ అందించబోతున్నారు. కొన్ని రాష్ట్రాలు ఇప్పటికే
వ్యాక్సిన్ ను ఫ్రీగా ప్రజలకు అందించేందుకు ముందుకు రావడం విశేషం. ఇలాంటి
సమయంలో సోషల్ మీడియా లో నిన్నటి నుంచి ఓ వార్త వైరల్ అవుతోంది. పీరియడ్స్
కు 5 రోజుల ముందు, పీరియడ్స్ కు 5 రోజుల తర్వాత వ్యాక్సిన్ వేసుకోవద్దని
ప్రచారం జోరుగా సాగుతోంది. ఆ సమయంలో మహిళల్లో రోగ నిరోధక శక్తి తక్కువగా
ఉంటుందని.. వ్యాక్సిన్ వేసుకున్న తొలి రోజుల్లో ఇమ్యూనిటీ తగ్గుతుందని, ఆ
తర్వాత క్రమంగా పెరుగుతుందని అందులో ఉంది. అందుకే పీరియడ్స్ సమయంలో
వ్యాక్సిన్ వేసుకుంటే కరోనా ముప్పు ఎక్కువగా ఉంటుందని దాని సారాంశం. ఈ
న్యూస్ నిన్నటి నుంచి బాగా వైరల్ అవుతోంది. అయితే ఈ న్యూస్ ను ప్రెస్
ఇన్ఫర్మేషన్ బ్యూరో (PIB) ఫ్యాక్ట్ చెక్ టీమ్ ఖండించింది. ఇది తప్పుడు
ప్రచారమని తేల్చిచెప్పింది. 18 ఏళ్లు నిండిన ప్రతి మహిళ ఎలాంటి భయం లేకుండా
వ్యాక్సిన్ వేసుకోవచ్చని చెప్పింది.
