బెంగళూరు నగరంలో ప్రవేశించిన ఒమిక్రాన్ను మరింత విస్తరించకుండా చేసేందుకు కర్ణాటక సర్కారు కట్టుదిట్టమైన చర్యలకు సిద్ధమైంది. ఇదే క్రమంలో ఓ రోగి తప్పించుకోవడం ఆందోళన చెందుతోంది.
- పాజిటివ్ వచ్చిన మూడు రోజులకే నెగెటివ్ రిపోర్ట్.
- ప్రయివేట్ ల్యాబ్ నివేదికపై పలు సందేహాలు.
- దుబాయ్కి పారిపోయిన దక్షిణాఫ్రికా వ్యక్తి.
ప్రపంచాన్ని ఆందోళనకు గురిచేస్తున్న కొత్త వేరియంట్ ఒమిక్రాన్ భారత్లో కలకలం రేపుతోంది. ఒమిక్రాన్ నిర్ధారణ అయిన తొలి ఏళ్ల వ్యక్తి (66) దక్షిణాఫ్రికా నుంచి వచ్చి.. వారం పాటు బెంగళూరులోని ఓ హోటల్లో ఐసోలేషన్లో ఉన్నారు. ఆ తర్వాత తప్పించుకుని దుబాయ్కు వెళ్లిపోవడంతో కర్ణాటక ప్రభుత్వం విచారణకు ఆదేశించింది. అతడు ఓ ప్రైవేటు ల్యాబ్ నుంచి నెగెటివ్ రిపోర్ట్ పొందడంపైనా సందేహాలు వ్యక్తం చేసింది.
పాజిటివ్గా తేలిన మూడు రోజులకే నెగిటివ్ ఎలా వచ్చింది? అలాగే, ఓ కంపెనీ బోర్డు సమావేశంలో పాల్గొనడం.. జన్యు విశ్లేషణ కోసం పంపిన నమూనాల నివేదికలు రావాల్సి ఉన్నప్పటికీ దేశం విడిచి వెళ్లిపోవడం తదితర అంశాలపై దర్యాప్తు చేయనున్నట్టు తెలిపింది. అంతేకాదు, అతడు పరీక్షలు చేయించుకున్న ప్రవేటు ల్యాబ్లో ఏమైనా అవకతవకలు జరిగాయా? పరీక్షలు పక్కాగా జరిగాయా? ఏదైనా తప్పు జరిగిందా..? తదితర కోణాల్లో విచారించాలని పోలీస్ కమిషనర్ని ఆదేశించినట్టు కర్ణాటక రెవెన్యూశాఖ మంత్రి ఆర్.అశోక తెలిపారు.
కర్ణాటక సీఎం బసవరాజ బొమ్మై అధ్యక్షతన శుక్రవారం సాయంత్రం అత్యవసరంగా ఉన్నతస్థాయి సమావేశం జరిగింది. ఈ సమావేశం వివరాలను మంత్రి అశోక మీడియాకు వెల్లడించారు. ఈ అంశంపై సిటీ హై గ్రౌండ్ పోలీస్ స్టేషన్లో కేసు నమోదు చేయాలని బృహత్ బెంగళూరు మహానగర పాలిక (బీబీఎంపీ) చీఫ్ కమిషనర్ ఆదేశించినట్టు చెప్పారు.
‘‘రెండు నివేదికల్లో ఒకటి పాజిటివ్, మరొకటి నెగెటివ్గా రావడం అనుమానాస్పదంగా ఉంది. కాబట్టి ల్యాబ్పైనా కచ్చితంగా విచారణ జరగాలి. తక్షణమే ఆరోగ్యశాఖతో సమన్వయం చేసుకొని దర్యాప్తు చేయాలని పోలీస్ కమిషనర్ని ఆదేశించాం’’ అని మంత్రి పేర్కొన్నారు. దక్షిణాఫ్రికా నుంచి వచ్చిన 10 మంది ప్రయాణికుల జాడ తెలియలేదంటూ వచ్చిన వార్తలపై మంత్రి స్పందిస్తూ.. ‘‘ఈ వార్తలు మీడియాలో వచ్చాయి. వాటిని పరిశీలించి వారిని ఈ రాత్రికల్లా ట్రేస్ చేసి పరీక్షలు చేయించాలని అధికారుల్ని ఆదేశించాం.. విదేశాల నుంచి వచ్చిన ప్రయాణికులు ఆర్టీ-పీసీఆర్ పరీక్షల నివేదికలు వచ్చేవరకూ ఎయిర్పోర్ట్ వదలిపెట్టడానికి వీల్లేదని’’ అన్నారు.
ఇక, పాజిటివ్ వచ్చిన దక్షిణాఫ్రికా వ్యక్తితో కలిసి దాదాపు 57 మంది వచ్చారని, వారికి పరీక్షలు నిర్వహించగా నెగెటివ్ వచ్చింది. అయితే, ఈ సమయంలో పది మంది ప్రయాణికులు మిస్సయినట్టు తెలుస్తోంది. నవంబరు 20 బెంగళూరుకు వచ్చిన అతడు.. వారం రోజుల తర్వాత తిరిగి దుబాయ్ వెళ్లిపోయాడు.
విదేశాల నుంచి వచ్చిన పది మంది ప్రయాణికుల మిస్సింగ్పై కర్ణాటక ఆరోగ్య మంత్రి సుధాకర్ స్పందించారు. దీనిపై అధికారిక సమాచారం ఏమీ లేదని పేర్కొన్నారు. ఒకవేళ ఎవరి ఆచూకీ అయినా తెలియనట్లయితే.. గతంలోలానే.. వారిని గుర్తించే సమర్థత పోలీసులకు ఉందని చెప్పారు. కానీ, ఎవరూ తమ మొబైల్ఫోన్లను స్విచాఫ్ చేసుకొని, ఆచూకీ తెలియకుండా చేయొద్దని కోరారు. అది సరైన పద్ధతి కాదని, ప్రతిఒక్కరూ బాధ్యతతో ప్రవర్తించాలని సూచించారు.
విదేశాల నుంచి వచ్చే విమాన ప్రయాణికులకు తప్పనిసరి ఆర్టీపీసీఆర్ పరీక్షలు చేపట్టాలి. నెగటివ్ నివేదిక ఉంటేనే నగరంలోనికి అనుమతిస్తారు. పాజిటివ్ ఉంటనే వారిని వారం రోజుల పాటు హోం లేదా ఆస్పత్రిల్లో క్వారంటైన్ చేస్తారు. నెగటివ్ నివేదిక ఉన్నా వారిని వారం రోజుల పాటు హోం ఐసోలేషన్లోనే ఉంచి తర్వాత ఆర్టీపీసీఆర్ పరీక్ష చేయిస్తారు.
