తక్కువ పొదుపుతో దీర్ఘకాలంలో కళ్లుచెదిరే రాబడి పొందాలని యోచిస్తున్నారా? అయితే మీకు ఒక స్కీమ్ అందుబాటులో ఉంది. అదే పబ్లిక్ ప్రావిడెంట్ ఫండ్ స్కీమ్. ఇందులో ఇన్వెస్ట్ చేస్తే రిస్క్ లేకుండా లక్షాధికారి కావొచ్చు.
- ప్రతి నెలా కొంత మొత్తాన్ని దాచుకోవాలని భావిస్తున్నారా?
- అయితే మీకోసం పోస్టాఫీస్లో అదిరే స్కీమ్ ఉంది
- ఇందులో డబ్బులు పెడితే కళ్లుచెదిరే లాభం వస్తుంది
- అయితే దీర్ఘకాలం పాటు డబ్బులు ఇన్వెస్ట్ చేయాల్సి ఉంటుంది
ప్రతి నెలా కొంత మొత్తాన్ని పొదుపు చేయాలని భావిస్తున్నారా? మీరు చాలా ఆప్షన్లు అందుబాటులో ఉంటాయి. వీటిల్లో పోస్టాఫీస్ కూడా ఒకటని గుర్తించుకోవాలి. పోస్టాఫీస్లో పలు రకాల పొదుపు పథకాలు అందుబాటులో ఉన్నాయి. వీటిల్లో డబ్బులు పెడితే మంచి రాబడి పొందొచ్చు. అంతేకాకుండా ఎలాంటి రిస్క్ ఉండదు.
రిస్క్ ఉండదు.. కానీ కచ్చితమైన రాబడి
పోస్టాఫీస్ అందిస్తున్న స్కీమ్స్లో పబ్లిక్ ప్రావిడెంట్ ఫండ్ పథకం కూడా ఒకటి. ఈ స్కీమ్లో చేరడం వల్ల ఎలాంటి రిస్క్ లేకుండా మెచ్యూరిటీ సమయంలో కళ్లుచెదిరే రాబడి పొందొచ్చు. మీరు ఎంత మొత్తాన్ని ఇన్వెస్ట్ చేస్తారనే అంశం ప్రాతిపదికన మీకు వచ్చే రాబడి కూడా ఆధారపడి ఉంటుంది. అయితే పీపీఎఫ్ స్కీమ్ మెచ్యూరిటీ కాలం 15 ఏళ్లు ఉంటుంది.
ప్రస్తుతం వడ్డీ రేటు ఎంత వస్తుందంటే..
పబ్లిక్ ప్రావిడెంట్ ఫండ్ స్కీమ్పై ప్రస్తుతం 7.1 శాతం వడ్డీ లభిస్తోంది. ఈ వడ్డీ రేటు మారుతూ ఉండొచ్చు. కేంద్ర ప్రభుత్వం ప్రతి మూడు నెలలకు ఒకసారి వడ్డీ రేట్లను సమీక్షిస్తూ ఉంటుంది. అందువల్ల వడ్డీ రేట్లు మారొచ్చని చెప్పుకోవచ్చు. గతంలో ఇంకా ఎక్కువ వడ్డీ వచ్చేది.
స్కీమ్లో ఎంత డబ్బులు పెట్టొచ్చంటే..
పీపీఎఫ్ పథకంలో ఇన్వెస్ట్మెంట్లకు ఒక లిమిట్ ఉంటుంది. ఒక ఆర్థిక సంవత్సరంలో గరిష్టంగా రూ.1.5 లక్షల వరకు మాత్రమే ఇన్వెస్ట్ చేయడానికి వీలుంటుంది. అంటే నెలకు రూ.12,500 వరకు డిపాజిట్ చేసుకోవచ్చు. అంటే రోజుకు దాదాపు రూ.410 వరకు పొదుపు చేయాల్సి ఉంటుంది. అలాగే ఏడాదిలో రూ.500 ఇన్వెస్ట్ చేసినా అకౌంట్ కొనసాగుతుంది.
రూ.40 లక్షలు ఎలా పొందాలి?
మీరు రోజుకు రూ.400 పొదుపు చేసి నెల చివరిలో ఆ మొత్తాన్ని ఒకేసారి పీపీఎఫ్ అకౌంట్లో ఇన్వెస్ట్ చేయాలి. ఇలా చేస్తే.. మెచ్యూరిటీ తర్వాత మీ చేతికి రూ.40 లక్షలకు పైగా వస్తాయి. ఇక్కడ మీరు ఇన్వెస్ట్ చేసే మొత్తం రూ.22.5 లక్షలు అవుతుంది. మీకు వచ్చే రాబడి రూ.18.18 లక్షలుగా ఉంటుంది. అంటే చేతికి రూ.40.68 లక్షలు వస్తాయి.
పన్ను మినహాయింపు ప్రయోజనాలు
పీపీఎఫ్లో డబ్బులు పెట్టడం వల్ల కేవలం అదిరే రాబడి మాత్రమే కాకుండా మరో బెనిఫిట్ కూడా ఉంది. అదే పన్ను మినహాయింపు ప్రయోజనాలు. ఆదాయపు పన్ను చట్టంలోని సెక్షన్ 80సీ కింద పీపీఎఫ్లో ఇన్వెస్ట్ చేసే మొత్తంపై పన్ను మినహాయింపు పొందొచ్చు. అలాగే వచ్చే రాబడి, విత్డ్రా మొత్తంపై కూడా పన్ను పడదు.
