కరోనా వైరస్ కొత్తరకం వేరియంట్ ప్రపంచాన్ని హడలెత్తిస్తోంది. దక్షిణాఫ్రికాలో బయటపడిన ఒమిక్రాన్ వేరియంట్ పలు దేశాలకు వ్యాపించడంతో ఆంక్షలు అమలు చేస్తున్నాయి.
- నవంబరు 26న జరుపుకున్న క్రిస్మస్ పార్టీ.
- ఉద్యోగుల కోసం ఏర్పాటుచేసిన ఓ సంస్థ.
- కోవిడ్ టీకాలు వేసుకున్నా అందరికీ వైరస్.
డెల్టా ప్రభావంతో వణికిపోతోన్న ప్రపంచ దేశాలను కొత్త రూపంలో వెలుగు చూసిన ఒమిక్రాన్ వేరియంట్ మరోసారి కలవరపెడుతోంది. వేగంగా విస్తరిస్తోన్న ఈ వేరియంట్ ప్రభావంతో రానున్న రోజుల్లో కొవిడ్ పాజిటివ్ కేసుల సంఖ్య మరింత పెరగవచ్చని ఇప్పటికే ఆయా దేశాలు అంచనాలు వేసుకుంటున్నాయి. ఇప్పటికే ఈ వేరియంట్ 38 దేశాలకు వ్యాపించింది. తాజాగా, ఈ సంఖ్య 46కు చేరినట్టు మీడియా నివేదికలు వెల్లడించాయి. అటు, ప్రజల ఉదాసీనత కూడా వైరస్ వ్యాప్తికి కారణమవుతోంది.
కోవిడ్ నిబంధనలు గాలికొదిలేసి వేడుకలు, పార్టీలు జరుపుకుంటూ కరోనా క్లస్టర్గా మార్చేస్తున్నారు. తాజాగా, నార్వే రాజధాని ఓస్లోలో కోవిడ్ నిబంధనలు ఉల్లంఘించి క్రిస్మస్ పార్టీని జరుపుకున్నారు. నవంబరు 26 జరిగిన ఈ పార్టీకి హాజరైన 120 మందిలో 100 మందికి కోవిడ్ పాజిటివ్గా నిర్ధారణ అయ్యింది. వీరి నమూనాలను జన్యు విశ్లేషణ పరీక్షలకు పంపగా.. ఇప్పటి వరకూ వచ్చినవారి నివేదికల్లో అందరికీ ఒమిక్రాన్ ఉన్నట్టు తేలింది. అంతేకాదు, పార్టీ ముగిసిన తర్వాత అదే హోటల్కు వచ్చిన 30 మంది కస్టమర్లు వైరస్ బారినపడటం గమనార్హం.
దీంతో క్రిస్మస్ పార్టీ ఒమిక్రాన్ సూపర్స్ప్రెడర్గా మారిపోయింది. వీరంతా కోవిడ్ నిబంధనలు కనీసం పట్టించుకోకపోవడం వల్లే ఈ పరిస్థితి వచ్చినట్టు నిపుణులు అంటున్నారు. కనీసం మాస్క్ ధరిస్తే చాలా వరకు వైరస్ను నిరోధించి ఉండవచ్చు. అయితే, భారీ వైరల్ లోడ్ వల్ల కళ్లద్వారా కూడా వ్యాపించి ఉంటుందని అంచనా వేస్తున్నారు. సరైన వెంటిలేషన్ లేకపోవడం వల్ల కూడా వైరస్ తీవ్రత ఎక్కువగా ఉందని భావిస్తున్నారు.
శుక్రవారం నాటికి నార్వేలో 19 ఒమిక్రాన్ కేసులు బయటపడగా.. 13 మంది క్రిస్మస్ పార్టీకి హాజరైనవారే ఉన్నారు. అయితే, క్రిస్మస్ పార్టీ ఏర్పాటుచేసిన సదరు సంస్థ మాత్రం తమ ఉద్యోగులు 70 మందే హాజరయ్యారని, మిగతా 50 మంది బయటివారేనని చెబుతోంది. అంతేకాదు, వీరంతా రెండు డోస్ల కోవిడ్ టీకా తీసుకున్నారని, పార్టీలో నిబంధనలు కచ్చితంగా అమలుచేశామని వాదిస్తోంది.
