వాట్సాప్‌ ద్వారా సైబర్ నేరగాళ్లు కొత్త తరహా మోసానికి పాల్పడుతున్నారు. ఈ విషయంలో జాగ్రత్తగా ఉండాలంటూ యూజర్లను హెచ్చరించింది వాట్సాప్‌. ఆ స్కామ్ ఏంటంటే..
- వాట్సాప్‌ ద్వారా కొత్త స్కామ్
- డబ్బు దోచేస్తున్న సైబర్ నేరగాళ్లు
- జాగ్రత్తగా ఉండాలంటూ వాట్సాప్‌ హెచ్చరిక
ఇటీవలి కాలంలో సైబర్ నేరాలు (Cyber Crimes) పెరిగిపోతున్నాయి. కొత్తకొత్త ఆలోచనలతో సైబర్ నేరగాళ్లు (Cyber Criminals) అమాయకులను మోసం చేస్తూనే ఉన్నారు. వీలైనంత డబ్బు దోచేస్తున్నారు. ఈ క్రమంలోనే వాట్సాప్‌ (WhatsApp) ద్వారా సైబర్ నేరగాళ్లు చేస్తున్న ఓ కొత్త స్కామ్ వెలుగులోకి వచ్చింది. ఇప్పటికే ఈ స్కామ్ ద్వారా మోసపోయి కొందరు డబ్బు కోల్పోయారు. ఈ స్కామ్ విషయంలో జాగ్రత్తగా ఉండాలని యూజర్లను హెచ్చరించింది వాట్సాప్‌.
కుమారుడో, కూతురో మెసేజ్ చేసినట్టుగా సైబర్ నేరగాళ్లు తల్లిదండ్రులకు మెసేజ్ పంపడంతో మొదలవుతుంది ఈ స్కామ్. ఆ తర్వాత తెలివిగా డబ్బు గుంజుతారు. బ్రిటన్‌లో ఇటీవలి కాలంలో ఇలాంటి మోసాలు ఎక్కువైపోయాయి. అమాయకుల నుంచి వేల యూరోలు కొల్లగొట్టారు సైబర్ నేరస్థులు. నెలల కాలంలోనే దాదాపు 50వేల యూరోలు మోసపోయారని సమాచారం. అలాగే స్నేహితులు చేసినట్టుగా మెసేజ్ లు పంపుతూ కూడా కొందరు సైబర్ నేరగాళ్లు డబ్బు దోచుకుంటున్నారు.
అసలు ఏమిటీ స్కామ్..
కుమారుడో, కూతురో మెసేజ్ చేస్తున్నట్టుగా “హలో మామ్, హలో డాడ్” అంటూ తల్లిదండ్రులకు మెసేజ్ చేస్తారు సైబర్ నేరస్థులు. ప్రస్తుతం ఇబ్బందుల్లో ఉన్నానని అత్యవసరంగా డబ్బు కావాలని మెసేజ్ పెడతారు. తమ ఫోన్ పోయిందని, అందుకే వేరే నంబర్‌ నుంచి మెసేజ్ చేస్తున్నామని పిల్లలు చేస్తున్నట్టుగా మెసేజ్ చేస్తారు సైబర్ నేరస్థులు. ఫోన్ పోయినందును బిల్ కట్టలేకున్నామని లేకపోతే ఏదైనా అవసరానికి అత్యవసరంగా డబ్బు కావాలని మెసేజ్ లో రాస్తారు. అలాగే డబ్బు పంపాలంటూ తమ అకౌంట్ వివరాలు పంపుతారు.
ఇలా మెసేజ్ లు అందుకున్న కొందరు.. తమ పిల్లలే డబ్బు అడుగుతున్నారనుకొని స్కామర్లకు డబ్బు పంపారు. పిల్లలు ఇబ్బందుల్లో ఉన్నారేమోనని ఎక్కువగా ఆలోచించకుండా ఆందోళనతో వేల యూరోలు పంపి బాధితులయ్యారు. ఫోన్ పోయిందని, బిల్లు అత్యవసరంగా కట్టాలంటూ కుమారుడు అడిగినట్టుగా మెసేజ్ రావడంతో ఇటీవల ఓ వ్యక్తి 2వేల యూరో ఓ అకౌంట్ కు పంపగా.. అది స్కామర్ పంపిన మెసేజ్ అని ఆ తర్వాత తేలింది. ఇలా మరో వ్యక్తి కూడా తాజాగా 3వేల యూరోలు మోసపోయారు.
ఇలానే స్నేహితులమంటూ నకిలీ మెసేజ్ లు చేసి కొందరి నుంచి స్కామర్లు డబ్బు దోచుకున్న సందర్భాలు కూడా ఉన్నాయి. దీనికి వాట్సాప్‌ ఫ్రెండ్ ఇన్ నీడ్ స్కామ్ అని పేరు. ఇదే స్కామ్ ఇప్పుడు రూపం మార్చుకుంది.
ఇలా పిల్లలు, స్నేహితులు డబ్బు అడిగినట్టు వచ్చే మెసేజ్ లతో జాగ్రత్తగా ఉండాలని వాట్సాప్‌ హెచ్చరిస్తోంది. కొత్త నంబర్‌ నుంచి ఇలా మెసేజ్ లు వచ్చినప్పుడు ఒకటికి రెండు సార్లు ధ్రువీకరించుకోవాలి. ముందుగా పిల్లలు, స్నేహితులకు కాల్ చేసి ఫోన్ పని చేస్తుందో లేదో చూడాలి. అలాగే అన్ని వివరాలను ఆరా తీయాలి.
