ఇటీవల కాలంలో ఈ తరహా చోరీలు ఎక్కువయ్యాయి. వరుస ఘటనలతో వాహనాల యజమానులు ఫిర్యాదు చేయడంతో.. పోలీసులు ప్రత్యేకంగా టీమ్‌ను ఏర్పాటు చేసి నిఘా పెంచారు
- పశ్చిమ గోదావరి జిల్లాలో హైవేలపై డీజిల్ దొంగలు
- వరుస ఫిర్యాదులతో నిఘా పెంచి ఏడుగురి అరెస్ట్
- గతంలో ప్రకాశం జిల్లాలో ఓ ముఠాను పట్టుకున్నారు
పశ్చిమగోదావరి జిల్లాలో ఇటీవల కాలంలో జాతీయ డీజిల్ చోరీలు పెరిగాయి. ఓ గ్యాంగ్ రోడ్డు పక్కన ఆపి ఉన్న లారీల్లో డీజిల్ దొంగతనం చేస్తోంది. వరుస ఘటనలతో వాహనాల యజమానులు ఫిర్యాదు చేయడంతో.. పోలీసులు ప్రత్యేకంగా టీమ్‌ను ఏర్పాటు చేసి నిఘా పెంచారు. హైవేపే అనుమానంగా తిరుగుతున్న ఏడుగుర్ని అదుపులోకి తీసుకుని ప్రశ్నించారు. అప్పుడు డీజీల్ చోరీ వ్యవహారం బయటపడింది.
కొంతమంది జల్సాలు చేసుకునేందుకు ఈజీ మనీ కోసం అలవాటుపడి ఓ వ్యానులో డబ్బాలు పెట్టుకుని హైవేలపై తిరుగుతున్నారు. రాత్రి సమయాల్లో రోడ్డు పక్కన ఆగి ఉన్న లారీలు, ఇతర వాహనాల ట్యాంకుల మూతలను పగలగొట్టి డీజిల్‌ను చోరీ చేస్తున్నారు. తక్కువ రేట్లకు అమ్ముకుని సొమ్ము చేసుకుంటున్నారు. నిఘా పెట్టిన పోలీసులకు ఏడుగురు అడ్డంగా దొరికిపోయారు.
ఆ ఏడుగురి దగ్గర నుంచి వ్యాను, కారు, డీజిల్, మొబైల్స్, డబ్బులు సీజ్ చేశారు. అరెస్ట్ చేసిన వారిలో పశ్చిమ గోదావరి, గుంటూరు జిల్లాలకు చెందినవారు ఉన్నట్లు పోలీసులు తెలిపారు. గతంలో కూడా ప్రకాశం జిల్లాలో పోలీసులు డీజిల్ చోరీ చేసే ముఠాలను అరెస్ట్ చేశారు. ఇప్పుడు తాజాగా ఏలూరు పోలీసులు ఆటకట్టించారు.
